砵蘭街淫業煙滅

2013年02月18日

爽爆：聖經降魔　救贖馬伕

52,010

適中字型 較大字型

砵蘭街淫業煙滅，曾經靠「雞」吃飯的人也各散東西。電影《西遊．降魔篇》中唐僧唱兒歌苦勸妖魔鬼怪改過遷善，作用不大，其實悔改這回事全靠自省。曾有兩個 淫媒馬伕，在大陸以至海外挑選佳麗帶回旺角，晚上的砵蘭街，曾因他們而照亮，其後雙雙金盆洗手，篤信基督，牛鬼蛇神變天使。話時話，幾時輪到黃大仙籤中的 小人改過自新？　記者：潘婉玲　攝影：海江田、胡堅

一個在亡母房間決志

在土瓜灣播道會樂泉堂，莫樹堅牧師向記者介紹洪恩明：「佢以前販賣人口！」年屆半百的恩明，早年安排妓女從吉隆坡來港，供應旺角的色情架步。人生兩大宗旨 是錢銀女人，「晚晚跳舞，年年換車，寶馬、Benz都躭過，一晚埋單幾千蚊，有時仲埋埋隔離張枱；賭錢試過一晚輸十幾廿萬」。
盜亦有道，他拒絕逼 良為娼，「有女俾男朋友呃過嚟話做侍應，我叫佢做一晚，賺番機票錢就放佢走，算係有風度㗎」。20幾年前搭上舞小姐，翌年誕下兒子。「無諗過搵夜總會嘅女 做老婆，但同佢一齊個零兩個月話有咗，因為之前有四、五個女人都為我落過仔，我覺得好折墮，所以唔鍾意都夾硬一齊」。
15年前虔誠基督徒母親撒手 塵寰，他晚晚到亡母房間悼念追思，毅然信主，一年間結束偏門生意。正途從不易走，錢銀女人都賠上了，從月入20、30萬元的「砵蘭街馬王」，降呢小巴月賺 幾千元。一段沒愛情的婚姻，13年前亦結束，「佢一直同我一齊都唔使做，做少奶，日日拎住張附屬卡（買嘢）；我做返正行之後，佢要出返嚟做嘢，結果識咗第 二個男人」。
教他痛入骨髓的是兒子一句話：「我唔鍾意你，唔鍾意主耶穌，因為佢拆散咗你哋！」上帝關上了門，總會打開一扇窗，雖然老婆走佬，但兒 子跟他上教會，聽他的分享見證，才真正認識這位老爸，重拾失落多年的父子情。

洪恩明年輕時晚晚跳舞，左擁右抱，人到中年卻毅然信耶穌，擁抱聖經。

譚文聰談起舊日威水史，難掩落寞神情。

一個多謝阿Sir拘捕

「蔡楓華都幫襯過我！」相隔多年，34歲的譚文聰未忘威水史，「嗰時我300幾個場（馬檻），一收電話就帶女過去」。他的女當然是指妓女，盤據「色情五 街」砵蘭街、新填地街、上海街、廣東道、登打士街，他每日淨袋三、四千元，「邊啲客最多？地盤佬囉，最疏爽實有貼士，反而西裝友最孤寒」。
文聰每次試鐘必拋下100元，雖然年僅廿幾歲，囡囡都叫他「老爸」，「放假帶佢哋玩，又做埋心理輔導，有病仲要帶去睇醫生，啲黑市醫生都熟晒啦！」這些病，包括性病及墮胎，有個小妹妹證件寫18歲，實則15歲，身懷三種性病，陰道有六道裂痕。
2000 年起當馬伕，其時砵蘭街已由盛轉衰，2003年皇崗實施24小時通關，嫖客24小時北上尋歡；2004年朗豪坊開幕，行高檔路線，警方大舉掃黃，連串重擊 令砵蘭街元氣大傷，馬檻數目從高峯期200多間減至今天30多間。2008年文聰告別砵蘭街，但兩年後因藏毒被捕留下案底，才真正金盆洗手，在警署竟跟差 人握手道謝：「阿Sir，多謝你，我可以唔撈喇！」
31歲才走上正途，寸步難移，「兼職清潔一個月得七、八千蚊，同老細又有拗撬，掃毒搞到大麻都 冇得食，我喺世界有乜嘢價值？咁啱嗰刻電視播緊節目講耶穌」。原來上帝早已預備，回首前塵，文聰無悔，「如果冇當初嘅我，今日就唔會信主」。

黃色事業由盛轉衰，譚文聰2008年離開砵蘭街，其後更信主走回正途。