港女唔讓座辣㷫大肚婆

2013年02月18日

門常開：港女唔讓座辣㷫大肚婆　影相放facebook掀罵戰

100,811

適中字型 較大字型

香港人零舍躁底嘅，小小事都可以發到好大。話說人靚樣甜、胸襟廣闊嘅大肚婆Jackie，日前搭港鐵嘅時候，入到車廂座位已滿，惟有寄望啲精力旺盛嘅後生 仔女讓座。Jackie企喺一對坐喺度玩緊手機嘅年輕女乘客面前，等待佢哋讓座，大家估媖結果係點？
「就係呢兩位妙齡靚女，無視我六個月的大肚連望我兩次都決定繼續玩手機……結果她們的朋友，一個比較平常樣的女生讓了給我。再次證明樣同教養係無關的。」Jackie寫道。

兩位冇讓座嘅「妙齡靚女」（左圖）俾Jackie（右圖）影低咗相，仲放上fb㖭。互聯網

振振有詞辯稱冇偷拍

Jackie喺facebook圖文並茂咁報道咗件事出嚟，兩位拒絕讓座嘅「妙齡靚女」被佢影低放上網供人檢閱。Jackie嘅做法，有人認同，有人質 疑。網友William話：「深有同感。有時遇到年輕力壯的人搶priority seat，唔畀大肚人士坐，好過份。」但另一網友Wilson就認為Jackie過火了：「但你偷影她們，將她們post上facebook喎，閣下之德 行，如此了了。」
大肚婆就振振有詞咁辯解：「我無偷影，我光明正大咁拎手機對住佢，仲有卡嚓一聲，佢望住我，我仲望番佢。之後佢個朋友讓我坐，我 仲坐係佢側邊。」但係事件餘波未了，正氣凜然嘅高登仔轉載咗Jackie嘅遭遇，引起好大迴響，其中網民「大頭蛇」留言可圈可點，唔知佢想幫邊個：「𠵱 家啲港女又無教養、又易發爛渣，希望個大肚婆唔好生女，唔係又一個惡性循環。」

難分肚腩定有孕　滬地鐵推讓座攻略

讓座本身係一種美德，但係千祈唔好係又讓、唔係又讓，相信大家試過或者聽過，有乘客讓座畀啲大肚腩嘅女士，誤會佢係孕婦，對於無辜受讓嘅女士造成莫大嘅心 靈傷害，一世有位坐都補唔番；對於讓錯座嘅人而言，亦會帶嚟深刻烙印，以後睇見肥女人都心跳加速、汗流浹背。
唔想出現呢啲尷尬場面同埋終身創傷，就要準確辨認大肚婆同大肚腩嘅分別，但係呢樣嘢博大精深，隨時連婦產科醫護人員都會搞錯。上海地鐵公司就發佈咗一套「孕婦讓座攻略」，列出孕婦嘅特徵，同埋萬一真係認唔出嘅應對方法：
1.如果穿防輻射服（內地流行嘅金屬纖維製孕婦服裝）的肯定是孕婦；
2.腹部微突、平底鞋、不化妝的八九不離十也是孕婦；
3.實在判斷不出，就讓出座位，並說我要下車了（然後自己走到另一節車廂）。
其實呢個攻略都唔係萬無一失，有人建議所有大肚婆都載個襟章，寫住「我係孕婦」，咁就唔會搞錯。有人更加認為，孕婦根本唔適宜逼地鐵，如果的士行業推出孕婦尊享嘅乘車優惠，咁就乜事都冇啦。