2013年02月16日
記：《蘋果》記者 梁：梁國雄
記：戴耀廷的佔領中環方案，你有何看法？
梁： 殺傷力當然係非常之強，但𠵱家香港嘅溫和民主派，最大問題係又要唔影響經濟、又要唔影響呢樣嗰樣，嘥時間！堵路係啱，但民怨要到某一個點，嗰樣嘢唔係你 一年前設計到㗎。香港唔係冇「器具」（政黨、工會），而係用唔到。佢哋引導唔到群眾去佢自己底下，03年7.1後，有邊個政黨去吸納晒啲群眾？冇！
其 實最具殺傷力唔係佔領中環，而係佔領中環之後發生嘅事。如果一萬人喺一個地方唔走，會變咗個「雙重政權」duo power，埃及和平廣場、北京天安門廣場都係咁，會一路形成一股同政府對立力量，有咗呢個duo power，先至係啱啱開始。我一定參加，但戴生呢個方法又要咁樣，又要咁樣（事前宣誓、演習、開會討論政改方案），即係……大家傾吓啦。
記：推行佔領行動爭普選時，預計會有何困難？
梁：我睇到有好多民主派話如果有普選，23條（立法）都唔緊要，呢個係完全脫離民意。要先有真普選，至可以啟動23條（立法程序），我覺得呢個將會係我哋同共產黨最大嘅爭論。我哋冇理由為咗得到一間屋（政改），先畀咗自己條命（23條立法）出嚟。
記：屆時泛民能否團結？
梁：講到呢度就冇得講。五區公投咁溫和嘅運動都產生咁大分歧，其實係因為中共嘅壓力。如果香港嘅泛民咁怕中共，咁搞乜嘢呀？返屋企瞓覺啦！
記：佔領中環、五區公投、泛民總辭，那個行動最有效？
梁：如果當日五區公投成績好，跟住一定係佔領中環。當日唔係民主黨阻撓，我哋攞到100萬票，我哋就攞到個授權，一定可以發起抵制政府運動。公投後若泛民總辭，最終都會變咗街上反抗運動。
記：來年的政改之爭，你認為應如何「砌」？
梁： （超級區議會）何俊仁一個人辭職已可啟動公投啦，咁就係佔領中環最好嘅前哨戰。（上次政改方案）共產黨自己做咗個陷阱畀自己。應先發動一個五區公投運動， 等香港人表態，又容易統計到民意。如果有100萬人投票，有27名議員總辭，唔係震撼係乜呀，股市最少都跌5,000點啦！癱瘓中環當然係比投票更進一步 啦，如果你連召集100萬人去投票都召集唔到，你點召集到一萬人先？
記：預計會有何打壓？
梁：統治者一係等你慢慢過去，一係鎮 壓。咁主事嗰幾個一定拉！公民不服從運動，唔係話冇暴力，而係你自己唔使用暴力，迫使對方使用暴力。佢拉你、判你十年監都係暴力，唔使喺個鏡頭前，一槍打 爆你個頭。所以如果冇犧牲精神、冇準備過坐監，用「和理非非」（和平、理性、非暴力、非粗口）係嘥時間！我自己都要接受考驗，我都57歲人，到時若果判十 年，67歲出嚟都變咗廢人。
老實講，好似我哋呢代人，蹉跎咗咁多歲月，已經對香港人、對下一代唔住，咁𠵱家仲唔做，等到幾時？
記：過去數年你都有參與堵路抗爭，為何未見迴響？
梁：我哋係失敗咗，社會份量唔夠、宣傳唔夠。公民抗命，一定要啲頭面人物行出嚟。你試吓27個議員話決定咗唔走，最少都聚番一千幾百人，整吓整吓就大啦。戴耀廷最大貢獻係打破呢個禁忌，話畀人知原來一個政治領袖，係應該做違法嘅嘢。好似劉慧卿嗰啲「和理非非」邊有得搞？
記：對政改方案有何意見？
梁： 提名委員會可接受，但邊個有十萬提名就可做候選人，呢個就點都要修改《基本法》。立法會，一半係地區直選；一半係政黨名單制，例如選民投社民連後，我自己 排自己候選人；功能組別一家要廢除，回歸前新九組模式都不接受，唔係第日你十萬又係選一席，2,000人又係選一個，共產黨都可以話呢啲都叫做一人一票 喎。
沒有留言:
張貼留言