2013年02月16日
記：《蘋果》記者 戴：戴耀廷
記：你為何會提出堵路、佔領中環方案？
戴：梁振英唔肯講幾時先開始討論政改。如果2013年講唔到幾時傾政改，2014年先傾，時間咁緊迫，我哋唔去做啲準備工夫，只會俾人牽住鼻子走。我哋要搶番主動權，有咗（佔領中環）呢個最大殺傷力武器，希望能夠進入對等談判，同北京傾真普選，唔係再搵啲嘢hea我哋。
記：你的佔領行動何時開始，如何一步步落實？
戴：首先要泛民有共識，已需要一個好長時間。今年7.1未到時機，真正谷到怨氣，係成個普選夢打碎晒時。行動係透過相當數量嘅人「委身」，然後希望影響到大多數嘅人。要時間醞釀，要啱時機。今年首半年係醞釀期，下半年係組織期。2014年頭睇吓係咪成到形。
我哋可以演習，可能搵個大球場演習一次show吓力量，call一萬人即到，咁你見唔見到我哋嘅力量、你驚唔驚？如果當時力量成形，咁進入談判期，唔使理梁振英，直接同北京談判。
談 判時會唔會重蹈民主黨覆轍，俾人出賣呢？我希望一萬人搵一日分組討論想要點嘅政改方案，進行投票。咁領導小組，拎住呢個方案去談判，你要就要，唔要就唔 要，唔需要承擔俾人話出賣。成個討論，超越咗泛民各政黨，係一個直接民主，商議式民主嘅模式。行動唔係爭普選咁簡單，係想重塑一種政治文化，大家要傾，要 聽對方說話，要經過一個過程。
記：你的方案又要演習、又要開會，到最後，一萬人會否變成「十個救火的少年」？
戴：如果香港真係只 得十個救火的少年，冇民主制度都冇乜問題啦，因為我哋根本都唔成熟。我哋只要求出席三、四次會議，同一次演習，大家show下力量、宣誓日。事前講清楚。 一萬人要好順暢咁調動，先發揮到力量，你一係唔好簽（宣誓），係一個好慎重道德責任。如果有十萬人簽，十個救火的少年都有一萬。
記：你預期行動時，將面對甚麼打壓？
戴： 之前咪抹黑囉，但你抹黑咗一個，千千萬萬個仲喺度。可能抹黑其中一啲主要領袖，最多佢咪退出領導層，但佢仍繼續係一萬個裏面其中一人。劉夢熊參加我哋都歡 迎㗎。另一個就係分化囉，咁唔使人分，我哋都分化咗啦，呢個計劃係要跳出呢樣，否則就講句「算吧啦」。如果泛民質素只係呢個地步，俾人分化到，咁香港都唔 適合搞政黨政治。
記：你認為共產黨真的會因此退讓？
戴：𠵱家嘅共產政權，同三十年前唔同。同1989年時唔同咗，冇咗最高權威 鄧小平，領導層最高權威，比以前江澤民、胡錦濤都要弱。呢個領導層可冒嘅風險，你用六四模式處理、你所付出政治代價，係咪你呢個領導層可以承擔得起先？我 所要求嘅嘢，只係你應承咗要落實，一個冇篩選提名行政長官機制，等選民自決。
冇篩選機制，泛民都未必贏。你出最勁嗰個余若薇，佢對手只要唔係梁振 英，佢都未必贏梗。因為香港市民知道余若薇做特首唔掂，唔係因為佢個人唔得，係因為同北京關係唔得。如果你要100%安全系數，咁你鎮壓囉，咁之後成個香 港點玩落去？你將香港變做深圳呀？鎮壓完後，邊個做特首呀，點樣管治呀，香港成個系統會冧咗，啲有錢佬仲唔雞飛狗走呀？
記：你的計劃，比起五區公投、泛民總辭有何優勝之處？
戴：佔領中環直接影響成個社會秩序，政府唔可以唔做嘢，一係驅散，一係回應，同我哋妥協，說服我哋走。你驅散，跟住咪去警局、法院囉，壓力仍然存在。公投完咗，政府係可以唔郁。
記：近年7.1過後，都有V煞在中環堵路，為何他們沒引起迴響？
戴：V煞、堵路，只係批評現制度不公義。但我哋需要建立一個公義民主制度，同有冇嗰種文化、商談文化去支撐民主制度？制度唔公義，要抗衡佢，但假設我哋爭取到普選，跟住要講係公平制度內點相處。一定要進入制度內商討。
民主制度都可以好壓制性，所以要超越壓制性民主制度，進入對話民主制度。係西方Deliberation democracy，唔係election democracy，election democracy係民主基礎，但唔可以保證有商議性民主。
Election democracy只係投票嗰吓，投完就冇，參與好低。商議性民主Deliberation democracy，除咗投票嗰吓去表達意見之外，仍有好多機會喺政策制訂時去參與，公平制度下，我願意去聆聽唔同意見。香港嘅泛民主派，分歧唔係喺理 念，而係喺方法度，因而勢成水火，呢個咪反映我哋民主文化唔成熟囉，冇得透過去聽而有一個共識。我提出來，唔係堵路，堵路只係表面一個sign，背後係要 重塑政治文化，點睇民主制度。
沒有留言:
張貼留言