群蛇恩人 救得一條得一條

2013年02月14日

爽人物：群蛇恩人　救得一條得一條

47,717

適中字型 較大字型

梁頌豪強調圖中的蛇僅作學術研究，並已即時放生，他並勸喻一般市民切忌效法觀蛇，免生危險。梁頌豪提供圖片

梁頌豪（Alex），31歲，港產野生蛇保育專家，曾協助內地研究機構追蹤「港蛇」生態。由加拿大回流香港，堅持每周到野外作田野紀錄，六年間為300條 港蛇作生態紀錄，包括出沒地點、品種，甚至性別。別人觀鳥，他就觀蛇；別人食蛇，他就救蛇，但是原來這名另類「蛇王」，曾是繁殖毒蛇的專家，高峯期養過逾 300條蛇。由熱衷大量人工繁殖到成為港蛇保育大使，他有話要說。記者：呂麗嬋

「由細到大，我都好鍾意養啲古靈精怪嘅生物，蜘蛛、蜥蜴、小蟲蟲，其他小朋友一見到嚇到喊，我見到啲爬蟲就鬼咁開心。讀幼稚園中班嗰年，阿爸就買咗條草蛇 返屋企，我仲記得寵物店教我哋餵草蛇食麥皮蟲，結果條蛇好快就死咗。到咗初中，全家移民，喺加拿大我先真正養屬於自己嘅第一條蛇。

這條受了傷的翠青蛇（圖）常被誤當青竹蛇（右圖），Alex將之救回，稍後將放回野外。

青竹蛇

蛇的外形並不討好，偏偏Alex卻當寶。

六年記錄300條野生蛇

外國地方大，我住嘅獨立屋有個好大嘅地庫，全密封，最啱養蛇。嗰時好瘋狂，乜?蛇都養，眼鏡蛇、飯鏟頭，越毒越罕有越啱。由細到大我做乜嘢都好認真，嗰時 真係跟咗個外國專家學人工繁殖毒蛇，唔同品種七彩繽紛，先養冇毒但性格好惡嘅，累積咗經驗就養毒蛇，高峯期時養咗超過300條！繁殖得太多，就賣畀人賺外 快。
2006年我回流香港做嘢，住嘅地方冇加拿大咁大。唔方便養咁多蛇，我就買咗本介紹香港蛇類嘅圖鑑研究，原來香港地方細細，都有52種原生品 種，好有趣。其實，喺香港行山不時都會見到蛇，我開始對觀察野生蛇嘅習性產生興趣，譬如香港嘅冬天唔會好似加拿大咁凍，港蛇維持低活動量，但就唔會冬眠。
有 次心血來潮，行山時聽啲村民講得多，我竟然一個人去咗大帽山搵野生蛇！條村附近有好多溪澗同埋水道，都係蛇出沒嘅熱門地點，我帶埋蛇勾、電筒、手套全副裝 備，邊行邊搵，結果真係俾我喺排水道，發現咗條紅脖游蛇（Red-necked Keelback）！呢種蛇係香港原生品種，比較罕見，但有毒，要好小心。我不動聲色，用蛇勾勾佢出嚟，佢冇點掙扎，我跟手影相、記錄發現嘅地點同溫度， 然後放咗佢。第一次觀蛇就有收穫，心雄又興奮。後嚟我索性每星期到野外做紀錄。
六年嚟，就先後搵到200、300條，有活嘅，亦有已經死咗嘅。去得多，我發現好多香港人原來好驚蛇，一見到唔係大嗌，就係九秒九打死佢。
其 實，香港野外最常見嘅青蛇，除咗有毒嘅青竹蛇，仲有一種叫翠青蛇，呢種蛇性情溫馴，可惜因為佢嘅色澤外形同青竹蛇有九成似，結果成日被「點錯相」打死，有 統計指近年翠青蛇數量已大減一半，我喺郊外就成日見到佢哋嘅蛇屍。所以，最近新都會廣場舉行嘅蛇展，我都專登攞咗一條我喺野外救回、正喺我屋企養傷嘅翠青 蛇嚟展覽，希望外界對佢哋有多啲認識。

保持兩三米距離好安全

好多人對蛇嘅恐懼，其實都係因為唔理解。論體形，人類大過蛇咁多，九成五以上嘅野生蛇，見到人類只會諗住逃走，只要保持兩、三米距離，基本上已好安全，如 果真係不幸俾蛇咬到，認住蛇樣，立即到醫院，對症下藥。
我諗，只要了解唔同蛇種嘅特性，人類同野生蛇絕對可以和平共處。」