2013年03月06日
香港家長對細路照顧無微不至，但係有啲過分關懷，變成24小時喺仔女上空盤旋嘅直升機家長。童裝店老闆娘Maggie就因為喺個女嘅書枱上裝咗個閉路電視
（CCTV），仲公開喺facebook分享個女嘅趣事，俾網友批評侵犯私隱，搞到佢最終要將個post鏟走，兼夾道歉。
事緣Maggie前日喺fb分享：「我喺阿女個書枱燈度裝咗個IP
Cam，睇佢做功課。今日26分鐘完成三樣，時間唔錯。但係發現佢自言自語講無聊野，一邊做一邊唱歌，同埋仲玩咗半分鐘擦膠碎。」
有家長聲援非侵私隱
對於Maggie嘅舉動，網友有讚有彈。Zoey Lam留言話：「將心比己啊！你返工，老闆就由你埋位做嘢開始睇住你，你感覺如何呢？老闆話到明裝個Cam錄低你上班時間做緊啲乜，你又會點諗啊？」 Hayden Cheng亦接力譴責：「好慶幸我媽咪唔係你呢種咁嘅人，如果唔係我呢20年一定喺被監視嘅惶恐下度過。」不過亦有家長聲援 Maggie，Carrie Cheung話：「我都贊成在職媽媽咁做，睇吓佢係咪自己做（功課）都好呀！功課都唔係乜嘢私隱啦，我喺圖書館見到個姐姐幫個小朋友填顏色同講晒答案畀佢 聽。」Ar Chuen就話：「作為子女監護人，監察同保護小朋友係家長嘅責任，我唔會用cam影人哋啲小朋友或其他人，但喺屋企嘅時候，就唔信你唔會悄悄望吓你嘅小 朋友做緊乜；係出於關心同照顧，而唔係無理同非法嘅用途。」
由於爭論越演越烈，Maggie最終鏟走咗fb嘅分享，並且發出咗一份「道歉啟示 （事）」，內文話：「有關之前本粉絲專頁發佈之監察女兒做家課照片引起部份人不滿或不安，本人深表歉意。有關各方提供的意見，本人定必深思反省，亦明白大 家是為了我女兒的將來表現關心，感謝各界關顧。」
《Baby親子雜誌》總編輯伍妙敏認為，喺屋企裝cam睇住仔女，父母咁樣做會安心啲嘅話，本來 無可厚非，但係都要視乎細路本身嘅反應，「最緊要孩子有冇反感，如果佢哋唔鍾意都照裝，就會令個細路對父母產生反感。而且子女成長過程或者會撞吓板，無時 無刻睇住係不必要嘅，父母總要放手畀啲空間佢哋」。
沒有留言:
張貼留言