v 茶記東主白手興家變一無所有 市區重建收舖 製造香港哀歌

2013年03月25日

茶記東主白手興家變一無所有市區重建收舖　製造香港哀歌

84,303

適中字型 較大字型

■茶餐廳東主朱國興住在後巷一間小屋，地下放雜物，睡床在閣樓。羅君豪攝

【本報訊】從身無長物到成為兩間餐廳的東主、置業、養活一家五口，57歲的朱國興是典型的「香港故事」。一場市區重建和地產狂潮，將香港故事變成「香港哀 歌」，阿興賣樓支付遣散費，生意、物業沒有了，家沒有了，連海外留學的兒子也被迫停學，辛勤30多年，他嘆道：「我唔煙唔酒又唔賭，安份守己工作……𠵱 家乜都冇晒。」
記者：盧勁業

在大角嘴晏架街，阿興雖然擁有海皇茶餐廳和海皇快餐店兩舖，但他卻住在餐廳後巷一間小屋，走幾步就到，不足50方呎，後巷污水臭味陣陣，每逢大雨都沖來很 多垃圾。他說：「以前一家人住喺度，日子都係咁過，喺度直接起身就可以開舖。」
1980年代的黃金歲月，阿興和太太、大女兒都在這小屋度過。當時 他在這巷口有一個電工小檔，「我讀書唔多，喺後巷同人維修電器搵食，算儲到啲錢」。1993年他與兩友人合資開快餐店，其後擴充營業，接手毗鄰的茶餐廳； 後來兩拍檔先後退股套現。同於1990年代初，他的大兒子和小女兒相繼出世，其後夫婦分居。太太帶着兩名年幼子女住居屋；阿興則與大女兒住450方呎的自 置物業。

■海皇茶餐廳將隨重建計劃而消失。

「樓市升到咁，原區租唔到舖」

多年來，阿興每朝4時起床準備開業，「嗰陣係辛苦㗎，但係做得好開心嘅。有地方住，仔女開始大，都覺得安樂」；容易滿足的他，仍以後巷小屋為基地，很少返回私樓。
噩夢從2008年政府宣佈大角嘴重建開始。阿興的餐廳和小屋，都在重建範圍內，「50幾歲人我仲可以去邊？嗰陣又供緊仔女讀書……我哋就等佢傾賠償啦，點知一等就四年；佢哋先搞咗樓上租客、住戶……最後先處理地舖」。
2010 年，樓上住戶陸續搬遷，「半年間所有人走晒，一日三餐嘅生意一下子冇晒」。此時業主更加租數千元，「（業主）講『我一日叫你拎多200幾蚊啫，咁都冇？』 我都啞咗唔識答」。「我養住20幾個員工家庭，唔可以話執就執，惟有蝕做。」阿興說：「（夥計）入來時年輕力壯，到𠵱家都已經兩鬢斑白……佢哋仲可以去 邊搵（工）？」大多數夥計做了逾10年，較年輕的現已流失或遣散。
直到2011年下半年，市建局確定賠償，「兩舖加埋交成8萬蚊月租，佢只係用幾 十年前嘅應課差餉租值計賠償，計我月租4萬幾蚊；我後巷嘅物業只賠1萬（約30年前以5萬元購入）」，賠償總額合共190多萬元，連員工的遣散費都不夠支 付。他不肯妥協，遭政府入稟收舖索償。樓市瘋狂，雪上加霜。「（如果）話重建嗰一刻即刻賠，我都搬得郁。𠵱家點搬？」他說：「樓市已經升到咁，原區已經 冇辦法租到舖。去第二區開，茶餐廳冇街坊熟客點做？」
也許他沒有抓緊時機，也許他不夠精明，但在追隨他20年的員工眼中，他是個好老闆，即使蝕 錢，也從未拖過糧。阿興為籌措遣散費，把未供完的物業賣掉，並向兄弟姊妹借了70萬元周轉，「（員工）做咗十幾二十年，每個員工最起碼要10幾萬遣散 費」。

「我安份守己，𠵱家乜都冇晒」

「壓力真係好大！冇生意係壓力，供應商、市建局、業主、員工、官司，全世界向你排山倒海咁嚟。」阿興強忍淚水地說：「十幾年心血，一陣間就冇晒。我唔煙唔 酒又唔賭，冇不良嗜好，安份守己工作，但咁多年基業，𠵱家乜都冇晒。」訪問結束之際，他已工作了近14小時，一臉倦容：「我唔係想你哋可憐我，只係想多 啲人知道𠵱家嘅社區重建制度，對小本經營嘅租戶好唔公平。」
市建局回應指，按該局準則，非住宅租客的特惠津貼，須在成功收購有關物業後，才會正 式處理；金額按當時的應課差餉租值釐訂。至於當年阿興向街坊以現金買下的後巷建築，市建局指，由於他未能提供文件證明業權，該局無法提出收購或補償安排。

【夥計力撐】 ■做了20年的容姐（左）和葉師傅（右）指，阿興是難得的好老闆。

【食客不捨】 ■做了20年的容姐（左）和葉師傅（右）指，阿興是難得的好老闆。

【重建酒店】 ■做了20年的容姐（左）和葉師傅（右）指，阿興是難得的好老闆。

2013年03月25日

內疚兒子被迫停學

11,260

適中字型 較大字型

【特稿】
回想經營茶餐廳的20年歲月，「係辛苦㗎，乜嘢個人生活都冇，但總算捱大咗三個仔女」。阿興說：「𠵱家我乜嘢都冇咯，冇嘢都唔使驚，咪見步行步。」原本愁眉苦臉的他，反展露笑容說：「其實我覺得冇嘢，個命運係咁安排，問題差在你點爭取，結果係咁都冇計。」
阿興的大女兒早已自立，對於身在加拿大的20歲兒子和19歲小女兒，阿興有點內疚說：「餐廳生意唔掂之後，個仔𠵱家喺加拿大要暫時停學供細妹讀書，個女就半工讀。」
跟阿興分居多年的朱太，現仍在茶餐廳幫忙打理，記者希望和朱太談兩句，她垂下頭尷尬地說：「你哋問朱生啦。」隨即轉頭忙店務。阿興說：「我哋𠵱家仲係朋友。」

員工盼度過難關

直到阿興坐上電單車送外賣去了，朱太才向記者說：「希望你哋可以幫個忙，如實寫番個狀況出嚟。」
由開張做到現在的員工葉師傅說：「飲食業呢行你都知轉得幾快，老闆唔好我哋都唔會做成20年。」同樣做了20年的容姐也表示：「老闆人品好好，對員工好和善，從來唔發脾氣，希望佢可以度過難關。」
食客鍾女士說：「我幫襯咗間餐廳好多年，睇住佢哋由20蚊加價加到𠵱家40幾蚊。大角嘴𠵱家越來越少地方食嘢，𠵱家又少一個地方幫襯。」