2013年01月11日
鍾家麒打慣爛仔交，現在訩正牌上台打，反而學會留手。
17年前《古惑仔之人在江湖》面世，有個小伙子仰慕鄭伊健飾演的陳浩南有型又打得，後來走上了黑道。他年僅15時，門生50，索K平常事，街頭毆鬥視等
閒，終於逃不過法網，入過壁屋，也在正生書院待了五年。深悔昔日年少無知，毅然將一身本領帶上擂台，如今貴為香港散打代表隊成員。17年過去，鍾家麒的所
有故事像已發生漂泊歲月裏，新版《古惑仔江湖新秩序》本周上畫，當羅仲謙飾演的陳浩南仍停留在街頭，他已代表香港出征。 記者：陳勝藍 攝影：胡堅
《古惑仔》主題曲《友情歲月》這樣唱：「來忘掉錯對，來懷念過去……」現年21歲的鍾家麒反其道，寧願忘掉過去，錯對卻絕不敢忘。他說：「我好細個已經鍾
意打交，因為以前有睇《古惑仔》、陳浩南，覺得，嘩！原來你打得就乜嘢都得！」
正生日子艱苦，但家麒願意多留三年進修。
睇完《古惑仔》鍾意晒馬
升中那年加入黑社會，自此變本加厲，「跟咗大佬，個人變咗，更躁，鍾意嘈交，因為有大佬撐腰，一響朵（表明身份），人哋點都會畀啲面，打交有人幫」。散打 技高者勝，黑幫毆鬥卻是恃多為勝，「可能俾電影橋段影響，鍾意晒馬」。家麒南征北討，快意恩仇，但他自言並非享受打鬥，「我享受群毆過程！鍾意每 次打交後面成班人跟住，即使知道自己唔夠打。可能自己要面，要型畀𡃁仔睇，要行頭，要打先」。2006年除夕20幾人挑戰對方70餘人，被打到變豬頭； 又曾經將對手打到入深切治療部，「試過打打媖執起鐵通又打，拋開鐵通執起嚿石又打……以前好冇性」。
夠狼夠狠，15歲便上位，「我本來跟一個大 佬，我條氣唔順，覺得佢冇用，又唔出名，佢吹雞我唔應雞，我大佬嘅大佬親自搵我，叫我跟佢，咁就上咗位。一開頭喺屯門好難捱，我15歲紮職，當時成個屯門 我最快紮職，年紀最細，成個屯門嘅大佬都針對我，想冚我旗」。
家麒（左）初入正生仍好鬥，後來校長陳兆焯（右）令他洗心革面。
賣老翻被捕 入正生悔過
三日內招攬50個手下，為他販賣翻版光碟，曾在某年春節期間，兩日內淨賺四萬。成也老翻，敗也老翻！有次手下外出吃飯，他獨守店舖，海關臥底扮作顧客，將 他推埋牆，他竟然撼頭埋牆，「我諗住自殘，大嗌『警察（海關）打人呀！』用呢條屎橋，點知我一撼，佢㩒住我個頭唔畀我撼，佢話『𡃁仔玩嘢呀？踎低啦！』 咁就衰咗」。由於他未成年，可以選擇入教導所三年，或到正生書院兩年，他選了後者。入到芝麻灣校舍，一生首次跑馬拉松。有次香港散打隊造訪正生， 讓他接觸這項格鬥運動，「原來正常活動好玩過以前，以前擔驚受怕，身懷K仔閃閃縮縮，唔得光明正大，行出街又驚、又煩、又俾龜𢭃（被警察截查）」。
兩 年過去，他為了投考消防員，自願「加監」三年讀畢中六。半年前離校，雖然最終不獲消防處取錄，但不相信會絕望、不感覺到躊躇；現於咖啡館烤麵包，以前兩日 賺四萬，現在月掙一萬，勝在這口茶飯吃得安樂，堅拒重返黑道。「我唔甘心，付出咗幾年，如果行返轉頭好唔抵」。他為了避開舊友宿敵，轉了手機號碼，也從屯 門遷到沙田，跟祖母同住。
《古惑仔》劇照
苦練散打 學懂遊戲規則
家麒早在正生歲月已修習散打，畢業後隨香港隊到武漢集訓，又在香港盃比賽勝出，獲教練推薦入港隊，今年3月將出外比賽。從街頭打到上擂台，心態變了， 「𠵱家知道何謂武德，首先要尊重對手，第二，個遊戲規則係訩點數，唔係要殺人」。舊版《古惑仔》誤他多年，可會避看新版？「我唔會刻意去避，以前我細個，我估套戲冇問題，只係我唔識諗，俾佢影響到」。
導演劉偉強與古惑仔一樣拜關帝。
劉偉強無悔拍《古惑仔》「我好滿意」
1996年1月，劉偉強執導的電影《古惑仔之人在江湖》上畫，投資數百萬元，票房2,100萬元；之後他越拍越紅，除了另外五部《古惑仔》電影外，還有 《風雲雄霸天下》、《中華英雄》及《無間道》系列。新版浮誇不現實
事隔17年，劉偉強仍對《古惑仔》讚不絕口：「我每部戲都滿意，《古惑仔》當然滿意，我好滿意。我拍出一樣……火！」新版《古惑仔江湖新秩序》導演陳翊恒年僅31歲，17年前在澳洲念中學，在當地電視看到《古惑仔》，他憶述：「好似睇史高西斯的《盜亦有道》，黑社會片、江湖片中最memorable。」當時夢想在澳洲當導演，怎料17年後返港拍戲。
陳 翊恒指現時幫會活動不像80、90年代蓬勃，他不認為有人會因為新《古惑仔》而走上黑道：「今次拍得比原著誇張好多，我估如果拍得好現實，好似劉導演咁 拍，會令人覺得做古惑仔、入黑社會好有型；我諗呢個年代唔會有咁多𡃁仔睇完，加入『新記』或者甚麼幫會。
沒有留言:
張貼留言