有樓先嫁終成絕唱 港女焗住情義行頭

2013年01月15日

門常開：有樓先嫁終成絕唱　港女焗住情義行頭

90,061

適中字型 較大字型

「有樓先嫁」一向係港女尋找歸宿嘅天條，但喺地產霸權亂世下，深水埗80呎超豪劏房月租都要6,440蚊，現實嘅港女惟有向現實低頭，以行動證明冇樓都要 嫁，寧願結咗婚同家人一齊住，直頭好似元秋對狼英一樣咁有情有義，值得致敬！
新婚生活易（ESDlife）網站上年進行「結婚消費調查」，訪問咗 喺2012至2014年之間結婚嘅1,768對新人，其中95%受訪者希望婚後買樓自住，但有57%新人莫財，解決住屋問題已經成為結婚嘅最大難題，有 26%受訪者結咗婚都焗住同家人住，冇得享受二人世界。
經過「港女500」事件之後，大家知道結婚擺酒蝕多過賺，而私人樓樓價喺過去四年升咗 84%，上車盤嘅細單位更升超過九成，新人擺得酒冇錢畀首期，所以「公屋新人」持續上升，2009年只有7%住公屋，到上年已升到18%，升幅157%； 而住村屋同居屋嘅就有24%，只有56%受訪者住得起私人樓，大跌兩成。

近半新人婚後租樓

買唔到樓惟有租住先，婚後租樓嘅新人喺過去四年由33%飆升到43%，可惜調查冇「劏房」呢個選項，否則數字相信會好嚇人，正如運輸及房屋局副局長邱誠武 所講，有啲劏房劏得好靚㖭，相信會成為窮夫婦首選，梗係有存在價值啦。
查實樓市癲價改變咗港女思想，新人同老爺奶奶或者外父外母一齊住，話唔定可以重建獅子山下嘅倫理和諧關係，政府真係用心良苦。