15歲周庭：燃點燭光維護公義

2013年06月01日

隔牆有耳： 她堅持去集會　 周庭：燃點燭光維護公義

7,659

適中字型 較大字型

■周庭認為參加支聯會的集會，重要的不在口號，而在於認同平反六四的理念。

【隔牆對論】
誰可料到，「愛國愛民，香港精神」這樣燎原。丁子霖不滿了，李卓人腳軟了，陳雲起哄了，今年集會主題，變了是「去與不去」的爭論。六四燭光還是要薪火相傳，下一代去還是不去，才是問題。
學民思潮周庭繼續到維園，以世界公民身份，認為高呼平反六四，才是守護本土價值，用不着極端排外。去了11年燭光集會的「龍獅旗手」陳梓進狠批陳雲杯葛六四「冇人性」，同時不滿支聯會霸權，忽略港人感受，寧在彼岸尖沙嘴，點亮另一盞六四燭光。
記者：姚國雄　袁樂婷

記：《蘋果》記者　周：周庭，學民思潮成員

中港矛盾尖銳，間接令狹義本土主義抬頭。本土派力倡「井水不犯河水」，指港人毋須關心內地民主，杯葛六四燭光集會。90後學民思潮成員周庭唱反調，指參與 集會與所謂本土精神沒有衝突。六四是一場震驚世界、轟轟烈烈的學生運動，作為世界公民應該關心。維護公義從來不受地域限制，所謂本土更不應被演繹成極端排 外。

記：你們不曾親歷其境，也沒試過通宵看電視直播，為何有那麼大決心？那份感動又是從何而來？
周：90後去睇六四，可能唔似成 年人有咁深感受，但當睇番一啲片段同報道，對我哋嚟講都係好大嘅啟發、啟蒙。尤其係𠵱家參與緊社會運動，會明白當時一班學生喺專制政權下走出嚟，要有好 大決心同勇氣，用自己生命做代價，為國家爭取民主。就算未知有坦克，但佢哋絕食時，已經有犧牲嘅心理準備。可能𠵱家喺香港，大家參與社會運動已經承受一 定壓力，何況係喺冇自由、冇民主嘅中國。

記：六四遊行之後，有人質疑學民思潮希望承傳八九民運精神是不切實際，香港學運不能仿效六四的悲情，如何回應這種批評？
周：無可否認每場社會運動都有好有壞，但我哋要去繼承嘅係六四做得好嘅地方。或者有人覺得八九學運嗰套喺香港唔合用，但對我哋嚟講，同樣作為學生，嗰種面對當權者嘅勇氣、想自己身處地方有改變嘅決心，係值得我哋尊敬同承傳。

記：本土派力陳港人不應介入中國民主鬥爭，認為港人不必到維園悼六四，甚至有人認為要求平反六四等於承認中共政權的合法性，你怎樣看本土派的言論？
周：我諗𠵱家嘅爭議好大程度係因為中港矛盾越嚟越犀利，所以開始有「族群割裂」嘅討論，有人覺得中國同香港係分開。我覺得全世界好多事係互相影響，守護身處地方嘅歷史文化固然重要，將本土利益放優先亦冇問題，但如果將「本土」變成好極端嘅一種排外，就唔係咁好。

記：他們認為參與六四集會有違本土精神，你覺得兩者是否有衝突？
周： 你覺得自己係香港人，先會有香港嘅本土意識，但我哋身份唔係得香港人一種。即使有啲人唔覺得自己係中國人，但始終係世界公民，對公義嘅維護唔應該受地域限 制。1989年，六四喺全世界引起好大迴響。一場轟烈嘅民主運動，唔單止要搵真相同為學生拎番個公道，更重要係重新審視社會制度、政權；對成個社會嘅批判 同反思，先係所謂平反嘅最大意義。由世界公民身份去睇六四，其實可以畀到大家一個理由去參與六四晚會。

「去六四晚會，唔係因為支聯會，更加唔係因為個口號，而係因為認同六四係要平反、中國有好多嘢需要改變。」

記：有人反駁，如果你覺得自己是世界公民，為何不關心其他國家發生的事，獨獨厚待六四？是否厚此薄彼？
周： 六四的確改變咗香港好多，有啲人選擇移民，有啲人開始驚；當年百萬人遊行，連平時唔會表態嘅人都上街，亦係好重要嘅啟蒙。一件咁大影響嘅事，我哋多啲留意 係應該。同埋見到中共用咁嘅方法對付參與運動嘅學生同民眾，你作為一個人都會覺得唔合理、好唔人道，唔係好嘅執政者會對人民做嘅事。
再者，好多香 港人好關心馬來西亞大選，老實講馬來西亞同我哋嘅距離仲遠，點解咁多人留意？因為睇到當地咁多年嚟都係一個專權政府，有咁多貪污，咁多社會問題，好想當地 人民有好啲嘅生活。同樣地，當你見到中國人民處於咁冇自由嘅環境，遊行要俾人監視甚至俾人打，咁多不公義，你話自己係維護公義嘅人，點解唔關心多啲呢？

記：杯葛六四集會的另一理據，是不滿支聯會本身和集會口號中的「愛國」色彩，你怎樣看？
周： 支聯會廿幾年嚟為呢場學生運動做咗好多嘢，唔可以抹殺佢嘅努力。如果你真係唔認同支聯會，唔想出席佢搞嘅集會，我會尊重可能有人自發去其他地方，或者留喺 屋企悼念。但我會覺得我去六四晚會，唔係因為支聯會，更加唔係因為個口號，而係因為認同大體上嘅理念，認同六四係要平反、中國有好多嘢需要改變。正如大家 參與反國教集會，都唔係因為學民思潮，而係自己有個原則，覺得國民教育應該撤回，所以先會嚟。