v 「愛」字頭組織「沉默之聲」自拆招牌打破沉默 愛的主題曲洗腦反佔中

2013年06月18日

隔牆有耳： 愛的主題曲　洗腦反佔中

17,552

適中字型 較大字型

佔領中環爭取真普選運動步步推前，睇北京頭嘅「愛」字堆組織都加緊開工，今次輪到曾經撐洗腦國教嘅沉默之聲，推出「愛中環」運動，自拆招牌打破沉默，頭炮 係創作咗首《愛中環》主題曲喺YouTube播放，歌詞係咁「We Love You Central」，話要「別去佔領與分化」。八方見首歌咁有二次創作潛力，搶先同佢哋製作個MV賀一賀佢。

Logo見中銀肉麻愛中國

八方聽見首歌啲歌詞，腦海即刻湧現唔少場景。一句「送走偏激藉着沉默發聲」，令人諗起愛字堆周街打人、另一句「做實事求進步」，即聯想到CY強推洗腦國 教，但對壓抑樓價就乜嘢都做唔到。聽到「美好香江和你和應」呢句，就諗起城邦派喺7.1遊行高舉龍獅旗呢一幕。

沉默嘅嘴巴打開咗，佢哋再下一城，呼籲市民一人自拍3秒鐘短片郵寄畀佢哋，用嚟同首歌配成MV，要入選一定要記得用右手大拇指同食指整個C字出嚟吖，目標 係整個健力士紀錄出嚟。佢哋又設計咗個愛中環標誌，Central最後字母l，用咗中銀外貌外形，荒死唔知佢哋愛中國咁。
沉默之聲副主席鍾慕蘭仲話，佢哋唔會去搞即將舉辦佔中講座嘅協恩中學，但又話學校唔應該宣傳佔中；至於係咪真普選，佢好似冇所謂，話之你有冇篩選，總之有得投票就接受喎。

pf_lee@appledaily.com