2013年04月20日
記：《蘋果》記者
梁：遵理學校校長梁賀琪
梁：遵理學校校長梁賀琪
記：如何看「全攻型收音機」風波？
梁： 當事人已否認咗，我去評論係唔公平。曾有名校老師教學生考英文口試，着校服去，因為人哋一睇你件校服，就知道你係乜料，心理上贏咗。又例如有人教你，無論 考試深定淺，一出試場就大聲話好淺，打擊他人士氣。又例如開考半小時，就舉手話要「攞紙」，等人知道你答得好順暢。我聽過全攻型收音機，但最驚訝呢單新聞 一出，呢部收音機搶購一空，其實呢種（擾敵）心態自古皆有。
文憑試一試定生死，學生、教師也是摸着石頭過河，中文科更被視為相當艱深。
記：文憑試下，補習社生態有何變化？
梁： 學生係功利，邊科影響到佢入大學就補邊科，𠵱家最多人補，排名係中、英、通識、數學，中文科係突然標咗出嚟，以前多數都係臨考先至嚟補中文，但𠵱家好 多名校尖子都嚟補中文。多得傳媒成日話呢科係「死亡之卷」，名校生英文好，但係對中文冇信心，唔識睇文言文，但想讀嘅大學科目中文要「摘星」，加上𠵱家 好難搵好嘅私人補習。
其實無論教改、兩試變一試，中學生全數直升高中，唔少人都以為補習冇得做，但其實仲係有得做，兼且係可以做到 recession-proof（免於衰退）。03年百業蕭條，補習界仲係一枝獨秀。文憑試一試定生死，反而令補習社更有得做，因為學生完全冇公開試經 驗，一個試就決定學生未來四年接受乜嘢教育，或者仲有冇得接受教育。
當年「補習天王」史Sir被揭發只有中五畢業，但近年多間補習社也標榜其教師畢業於會計、法律等專業，不少更是一級榮譽畢業，尖子捨棄專業，寧投入補習界。
記：為何條件優厚的人會入行？
梁：長春藤世界級大學、一級榮譽畢業生，仲有中大、港大教授，都嚟應徵。以前冇，可能啲人未必咁接受補習，會覺得補習老師係牛鬼蛇神，唔好意思話畀人聽自己做補習，擔心俾人哋暗笑，但𠵱家應徵嘅人，以往讀書都有補習，所以冇咁抗拒。
有 個教授，月薪10多萬元，有老婆同兩個仔，佢話佢嘅收入僅僅可以喺將軍澳、馬鞍山置業，但以前佢呢個級數嘅人已住羅便臣道、西半山、九肚山，𠵱家變咗馬 鞍山，佢哋想嚟做，明顯係想爭取更多「利」。我哋同補習老師係分賬，你嚟教，我只係掛多個人出嚟，但你要承受壓力，如果由學術界過來做，你係貶落凡間嘅天 使，其他人卻會覺得你只係想搵錢，心理要調節。
記：你如何看大型補習社的興衰史？
梁：補習界冇沒落，我見證好多起伏，呢一行波瀾壯闊，80年起，政府完全唔理，90年代初，政府高調拘捕補習界龍頭人物史sir，仲要「塔孖葉」，高調到好似場騷，當時大家擔心冇得做，政府致力打擊黃賭毒，第四樣應該係補習，嗰時一片愁雲慘霧。
但事實證明呢行仍然生存到，其後衍生video class（視像錄影課堂），睇錄影帶原來可以做咁大，因為冇限制，學生又接受，成件事變左「無限」。學生有問題，𠵱家有互聯網、有助教。行內有補習老教師，1個人手下有100個助教。
記：那麼，補習界面對甚麼問題？
梁：高租金，我哋係唔靠自由行可以生存嘅行業，真係唔知有邊個行業可以做得到。我其中一間分校月租逾100萬，但加幅先至得人驚，試過
加150%。有發展商唔同你傾續租，直情叫你走，因為補習社即使交到租，但都吸引唔到自由行。補習社唔容易搵地方，法例規定補習社唔可以離地24米，有時唔係我唔想租高層，而係法例唔畀。
記：你會如何形容現時的補習界？
梁： 係另一個朝代開始，𠵱家入行嘅人條件好咗，但同時學生係無情，佢唔會同你講，「俾多個機會你」；教得好，咪同你講感情囉，唔會話「我唔會離棄你」㗎。資 訊發達，學生想補邊個、想知道邊個教得好唔好，上網就知。老師優勝劣敗，好快就知。呢個朝代唔會有完結嘅一日，對家長嚟講，衣、食、住之後唔係行，而係子 女嘅教育。
沒有留言:
張貼留言