極端實用主義

2013-8-20 6:00:04

Share on facebookShare on twitterShare on sinaweiboShare on email

最近同大學同學聚舊，唔少都晉身大學學系管理層，講起內地學生來港升學，大家都認為內地學生比本地學生優勝，不單學業成績表現好，待人接物、跟教授老師相處，協助研究，好使好用，各方面均比香港學生成熟。

另一位商界管理層亦認同，指來港升學後留港工作嘅內地人，工作表現相對穩定及成熟，唔似本地畢業生，仲好似細路仔，大家不約而同擔心香港年輕一代將來唔夠競爭力。

港人價值竟被犧牲

我有多少保留，因來港升讀港大、中大及科大的，不少乃省市高考狀元尖子，學業表現突出係正常表現。全國成千萬高考生，最 top 班人應該係叻仔叻女。最重要內地精英教育，令佢地自小已經識得從實用主義角度出發，同老師教授交往，亦認識到人際關係網重要性。香港學生未必懂得 networking，因為呢種成人世界權力遊戲，香港細路未必有興趣，究竟一個大學生，應該保持赤子好奇之心，定係擅長人脈networking呢？

內地尖子精英可能比香港仔早熟，一時三刻表現佔優勢，但長遠而言，究竟是否可以成為真正精英呢？睇你點樣界定精英。我認為醒目叻仔，未必代表精英，反而要有價值信念。
極端實用主義，不需要信念，只要懂得選擇最快方法達到目的，一定在短期內走得比人快，贏在起跑線。





當整個國家由實用主義精英主導時，難以成為真正強國、受國際社會尊重。中國外交也被指為極端實用主義，重實利而輕原則，在香港人最關心之菲律賓人質事件，在實用主義外交原則下，人嘅價值自然會被犧牲，也令香港人失望。

近年香港年輕人追求價值信念，對台灣有好感，對內地疏離，因為台灣雖然小，硬實力不及內地，但軟實力卻高過大陸，有人文修養、多元價值以及生活方式，唔好睇少呢種軟實力，因為已足以擊倒實用主義掛帥嘅強國。