又一位石頭爆出嚟嘅問責局長

中門大開

2013-9-27 6:00:04

Share on facebookShare on twitterShare on sinaweiboShare on email

梁敬國係乜水？昨日政界中人你問我，我問你，都冇人識呢位月薪十八萬嘅新上任商務及經濟發展局副局長。繼吳克儉、黃錦星後，又一位石頭爆出嚟嘅問責局長， 問你死未。如果我係商務局常任祕書長黃灝玄會點諗？一位來自建造業議會工人註冊總監，稍為似樣嘅法定機構揸fit人都未做過，仲係通過一個無厘頭輪選程 序，要成一年時間，先至拍板請呢位梁副局？政務官心裡只有一個「X」字。

東拼西湊 如同山寨手機
呢位梁副局奇特之處，竟然以自己沒任何政治聯繫為賣點，問責局長負責乃政治工作，台前向公眾、傳媒、政黨、議會推銷政策，請條全無相關政治歷練嘅蛋散做 乜？其荒謬程度猶如捧一個五音不全懶音人做歌星。問責制當初推出，表面理據係補公務員不足，公務員專注政策制訂，問責官員專注政治遊說及推銷。

老董年代班問責官員都算似模似樣，至少有相當公職公務歷練，到曾蔭權年代，擴大問責制，新上場副局已開始出事，蘇錦樑、潘潔、許曉暉已被質疑，常任祕書長 當班副局係笑片看待，「問責制」形象早已衰咗。到梁振英一屆，新任局長除高永文稍正常外，其餘吳克儉、黃錦星、陳茂波又係一班蛋散，而陳茂波屢犯過失，死 不下台，更令問責精神消失無影。

十年下來，問責制仍停留在華強北路山寨手機level，零件東拼西湊，有民建聯落選議員劉江華，又有到今日都唔知自己做緊乜嘅陳肇始教授，（大家完全唔記 得陳教授係高永文副手），又有同電力公司好老友嘅陸恭蕙，成個問責制用人標準不清不楚，如果係政治工作，就定要搵有公職、傳媒、智庫、政黨相關經驗，而唔 係要專才，以此標準，劉江華、陸恭蕙算合標準，但陳教授，梁敬國就唔應該請。但由於北京唔希望政黨執政，加上用人唯親，泛民黨派大多被拒諸門外，因此千揀 萬揀，到頭來得到一班「幫閒庸才」。

所謂副局淪為幫閒，因為冇政治歷練，上立法會Panel都會成日嗡錯，城市論壇都唔敢去，去到都係讀新聞稿，表現連一個政務官Staff Grade C都不如，要政務官扶住先識學行，仲攞十八萬人工！最後常祕就會將冇可冇不可，做錯也冇後果嘅工作分派比副局，就係專做三四線團體嘅主禮活動嘉賓，一線團 體及建制派大Show，當然留比局長，因為局長都要攞Sound bite，搶民望。

一國兩制、港人治港，十幾年已淪落為華強北山寨機水平！