蛇齋餅糭式施政

2013-9-13 6:00:04

Share on facebookShare on twitterShare on sinaweiboShare on email

梁振英早前於觀塘出席公眾論壇。

自關愛基金決定派錢比工廈非法劏房戶後，大家可以預計香港整套福利制度，其理性邏輯基礎將全面崩潰。香港過去一套福利制度你可以批評佢不近人情，又可以批評官僚因循保守，但多年來行之有效，樹立了一套制度權威，背後總有其合理性。

狂谷開支 好快赤字

殖民地時代一套資源分配方式，盡量將社會與政治分開，即係唔會由何喜華有份去決定社福資源分配，原因係要維持制度理性及政策延續性，需要由專業官僚作決 定。何喜華代表社會某些群體去爭取權益，必然希望打破公務員一套決策理性，要求特事特辦。公務員處理係政策，而唔係個案，唔會理個別case有幾慘情，亦 唔會因慘情個案而立即修改政策，因此先比政客抨擊為不近人情、因循苟且。公務員決策思維係一旦「特事特辦」，成套政策理性便崩潰，失去防衛理據。例如工廈 內非法劏房戶有津貼，咁其他有住屋問題嘅係咪又要比呢？究竟比到邊一層先至停呢？係咪在相對貧窮線以下所有人都要有津貼呢？

相反，政客思維就簡單得多，有理冇理，成功爭取就得，純粹短期行為，有case夠慘情就掟比傳媒做古仔，造勢迫政府特事特辦。關愛基金繞過公務員監察，林 鄭又鼓勵何喜華等委員攻擊公務員，自然走上民粹式派錢之路，最大鑊係派開咗冇得唔派，而關愛基金冇水時，最終只有由政府福利開支吸納，變成經常性開支項 目，變相將一大批民粹式開倉派米項目，偷偷變成長遠既定政策，如此一來，政務官福利資源分配權力，拱手交予一群不受立法會財委會監督之委員手上。

今年估計為救低殘民望，將有大量特事特辦民粹式福利舉措出台，大家一度以為新政府會做好政策規劃，解決深層次矛盾，如標準工時、全民退保等政策議題，結果 完全錯哂，梁營政府本質上不過係「蛇齋餅糭」式施政水平，以爭取短期政治效益。香港過去幾年得力於樓市股市皆旺，政府非經常收入大增，公共財政充裕，但而 家美國退市，加息週期將到，資金會逐步流出，本地息口會先上，樓市撻Q快來。公共財政收入下降乃必然趨勢，開支就谷到大一大，在蛇齋餅糭管治思維下，香港 好快會重回老董赤字見紅年代！