擁私家路 發展商為所欲為 無法成立法團 居民任魚肉 黃埔居民被屈260萬幫和黃修渠小業主促管理公司交權 否則上街抗爭

黃埔居民被屈260萬幫和黃修渠小業主促管理公司交權　否則上街抗爭

33,259

適中字型 較大字型

【本報訊】紅磡黃埔花園一條私家路的污水渠上月爆裂，經居民偵查後發現同屬和黃發展的三組建築海名軒、海濱廣場和九龍海逸君綽酒店的污水渠，都被接駁到該 屋苑，小業主多年來懵然不知，付出至少過百萬爆渠維修費。事件被踢爆後，發展商才主動支付今次及賠償過往的維修費用合共近260萬。居民極度不滿，談判小 組今開會，若下周無法與管理公司達成協議，下月初將上街抗爭。
記者：張嘉雯

位於黃埔花園德豐街與船景街的地下污水渠早前爆裂，維修費連管理公司酬金高達132萬元，有「醒目」居民覺事有蹺蹊，向管理公司查問下發現附近海名軒、海 濱廣場和九龍海逸君綽酒店，三個建築群的污水渠全駁到該屋苑，多年來維修費全由小業主支付，過往兩年至少三次爆渠，合共從屋苑開支總賬中支走逾126萬。

未經同意駁污水渠到黃埔

事件揭發後，小業主氣憤難平，一直關注事件的業主林先生說，管理公司得悉居民欲採取行動後「知驚」，主動提出支付整筆維修費並免去經理人酬金，「如果我哋 今次唔發現，佢已經攞走咗我哋呢筆錢；佢哋唔係自願畀，係因為揭發咗先無辦法。」
業主代表其後與管理公司總物業經理開會，對方承認三組建築均把污 水渠駁到黃埔花園，又指屋苑原來的總體規劃渠務圖無接駁外來渠管，「我哋最不滿佢未經法定程序，未經我哋同意就將條渠駁過嚟，（爆渠）之後又當乜事都冇發 生過攞我哋錢，喺屋苑總賬出數。」管理公司未有回應本報查詢。
林先生指，屋苑與另外三個建築群均屬同一管理公司，「佢哋以為呢啲係佢哋公司內部事務，唔使交代，下意識覺得：『駁咪駁囉，條渠我嘅。』唔覺得我哋有持份，唔記得條渠有咩頭暈身㷫，都係我哋付賬，點解佢哋（三組建築物）唔使分擔維修保養費？」
「喺 呢種關係下，商舖、大業主全部係同系公司、同一集團，點可能公正咁執行呢張公契呢？」林先生指由於無法成立法團，小業主已成立聯盟，截至周四已有逾半代表 支持下月初上街，要求管理公司無條件交出百分百權力，「管理公司唔係公契嘅守護人，唔係顧住所有業主整體利益，我哋要利用呢次咁惡劣嘅例子，要佢交番權力 出嚟。」

「唔好等到居民抗爭先傾」

該區區議員梁美芬指，管理公司一直用對抗方式處理問題，「搞到關係好惡劣先肯退一步，真係唔好等到居民要抗爭、用真係激烈嘅方式表達，先至嚟傾；居民本身 好忙，加百幾蚊管理費，大部份家庭唔覺得係咩，佢哋希望畀咗錢，可以有一個有質素嘅服務。」香港工程師學會前會長黃澤恩表示，三組建築是否要支付污水渠維 修費，視乎公契條文，「條渠嘅上游業主係咪要出錢，要法庭先判到，唔同政府渠，可以用納稅人錢。」

無法成立法團　居民任魚肉

18,045

適中字型 較大字型

■居民林先生對管理公司完全向發展商傾斜感到極度不滿。

【有血有淚】
黃埔居民苦水滿腹，2期懷疑冷氣僭建、5期地磚貨不對辦、7期 電梯不經G層……，小業主多年來與管理公司周旋，一次又一次接管理公司律師信，成立法團又不成功，代表個個氣憤難平，希望藉今次爆渠契機團結居民，討回權 利。區議員批評管理公司手持公契「以為自己大晒」，權力用到盡。

「問題核心係我哋根本冇制衡權，佢要我哋點就點。」居民林先生指，種種管理問題皆因屋苑無法成立法團，「只要有超過兩成業權人反對，我哋就搞唔成，淨係商 場個業權都過兩成啦！就好似打Snooker咁，set死咗，真係好荒謬。」
林指現階段只能成立業主委員會，「咁樣令我哋處於極不利位置，因為呢 個只係純粹諮詢組織」。該區區議員梁美芬批評管理公司不尊重居民，「好似揀清潔公司咁，居民示意佢揀A公司，點知佢最後又係揀番居民唔鍾意嗰間B公司。」 她又指管理公司經常「告居民」，「管理費係邊個交㗎？居民吖嘛，咁大嘅集團有啲社會企業責任係好應該，唔好揸住份公契就以為自己大晒，權力唔好用到盡，要 自我制約。」
《蘋果》記者

擁私家路　發展商為所欲為

14,860

適中字型 較大字型

■黃埔花園第7期電梯年前起不停地下層，對居民造成不便。

【豈有此理】
「偷雞駁渠」問題癥結在於私家路。居民和區議員指出，黃埔入伙 超過20年，管理公司一直以仍有土地未發展為由，拒絕把私家路交給政府，小業主承擔近八成保養費用，發展商則「坐享其成」在路上「為所欲為」，「成條街啲 舖頭都係佢嘅，可以揀擺咩廣告牌，選舉嘅時候畀唔畀邊啲政黨入嚟，都可以保持個主導權。」

居民林先生指，該屋苑自87年開始發展至今，私家路一直未取滿意紙，「管理公司解釋唔到，點解一直攞唔到（滿意紙），條私家路嘅保養、雜費都係由我哋（小 業主）支付，好唔公平。」他和其他業主擔心，日後港鐵站建成後，小業主要承擔的維修費變成無底深潭。
林批評管理公司只顧大業主和商戶利益，其中7 期的電梯原本可停靠停車場、地面及平台三層，三年前因商場租戶要求，突然封了地面出口，居民無論殘疾、老弱抑或推着嬰兒車，要由停車場到地面，均要經車輛 出入閘口斜路步行；住客從地面層到平台，要走十多級樓梯，曾有長者體力不支暈倒，受傷送院，但管理公司一直未有積極處理。
《蘋果》記者