2012七大神奇發明

門常開：2012七大神奇發明

2012 年即將成為過去，喺呢一年，香港過咗一個蕩氣迴腸嘅年頭。各大傳媒陸續推出大事回顧，有國際大事、香港大事、財經大事，連動物大事都有，但係爭咁一樣忽略 咗，就係過去一年，香港一班社會賢達愛因斯坦上身，發明咗好多前所未有嘅觀念同事物，等吳爽幫大家一一回顧吓喇。

吳爽

①最核心的核心價值

唐英年今年初競選特首時爆咗一句世紀金句：「捍衞我哋嘅核心價值，呢個係一個最核心嘅核心價值嚟嘅。」當時大家都笑佢語無倫次，但係睇番佢對手梁振英執政以嚟對香港核心價值嘅殘害，大家開始明白唐唐嘅微言大義嘞。

②時有時冇的密室

梁振英山頂大宅個密室好詭異，入伙時係有嘅，到咗競選時就冇咗，跟住俾人踢爆之後又有番，但係又因為搵牆封咗而突然唔存在，事實上又一直冇消失過，比起哆啦A夢嘅隨意門更神奇。

③睇見令人流淚的國旗

教育局局長吳克儉一上場即刻意圖硬推洗腦國民教育，官方教材同學校課程都好有創意，最強嘅當然係睇到就會感動落淚嘅國旗，呢啲嘢係進步無私嘅政黨先發明到。

④溫柔聲波炮

警隊喺幾年前先後引入咗四部聲波炮，係人都知，呢啲係用來驅趕示威者嘅武器，但係除暴安良嘅警務處今年發明咗個新用途，就係用聲波炮嚟談判，好嘢，禿鷹哥曾偉雄係得嘅。

⑤阿婆掌心雷

立法會選舉期間，民建聯區議員接送長者去投票，仲將寫住候選人陳克勤同劉江華編號嘅字條貼喺長者嘅手心，呢啲招數係真誠為香港嘅政黨先諗得到。

⑥冇人睇的電視節目

亞視今年多個節目零收視，包括《把酒當歌》、《金錢世界》、《微播天下》等等，王征原來自己都唔睇亞視啲節目，咁仲點會有人睇？

DR集團創辦人周向榮

⑦一生一世的毒針

DR美容集團為客人做靜脈注射，聲稱可以抗癌。有客人信以為真，咁就一世。喺政府嘅長期縱容下，香港嘅美容中心越來越有創意，乜嘢功效嘅療程都發明得出。