死人冧樓罰一萬 屋署有鑊極速彈
土瓜灣馬頭圍道死人冧樓，唔經唔覺都三年嘞，相信大家對於嗰一個灰飛煙滅嘅
驚嚇場面依然記憶猶新。春去秋來悠悠三載，呢一宗造成家破人亡四死兩傷嘅慘劇，到底邊一個要負上責任呀？喂，成棟樓砰砰嘭嘭冧到滿目瘡痍，罪魁禍首又唔係
地震，更加同隕石襲地球無關，冇理由不了了之啫。
東方電視
更多新聞短片
裁判官仲話，證據只能顯示被告喺塌樓前一星期，喺地舖鑿開樑柱同拆地台，但未能顯示有關工序對樓宇有幾大影響，證供不足以顯示被告 嘅行為令呢棟遲早會倒塌嘅樓宇提早倒塌。有關控罪最高刑罰係監禁三年及罰款一百萬元，控方向法庭呈交同類型控罪嘅刑罰，分別係罰款四千元至五萬元。
簡單咁講，四條人命罰一萬，平均一條二千五，你話邊個會服氣吖？好衰唔衰，被告朱偉榮表示自己無錢，家陣靠領取綜援過活，罰款會每個月由綜援扣減。亦即係話，仁慈到極嘅裁判官一方面從輕發落，另一方面罰款變相由公帑支付，納稅人服氣先至奇啦！
大家唔好以為被告鬆一口氣，其實朱偉榮自己都非常之咁唔服氣。朱偉榮離開法庭嘅時候表示感到無辜，認為屋宇署要負上主要嘅責任，因為佢曾經帶過屋宇署人員到場視察，對方表示結構安全穩固。好明顯嘞，被告覺得屋宇署唔應該將死人冧樓嘅一大個鑊卸畀佢。
所以話啫，今時今日做官真係好鬼死過癮o架，冇事冇幹就可以知法犯法違例僭建，有事有幹就可以有法不依推卸責任。馬頭圍道冧樓咁大件事，理論上負責監管嘅屋宇署居然連被告嘅身份都唔係喎，小市民服氣嘅機會微乎其微囉！
如果朱偉榮嘅講法正確無誤，屋宇署真係害人不淺o架，呢頭話結構安全穩固，嗰頭就冧到慘不忍睹。呢件事令功夫茶諗起另一宗慘劇，大樹倒塌壓死無辜途人，事前又係官老爺檢查過話冇危險o架，到頭來當然亦係毋須負責啦。
計功夫茶話齋，為官之道莫過於有責就要急急推卸，有鑊就要極速彈開，港產官僚一個二個深明此道，所謂問責制純粹係呃鬼食豆腐o架咋。除非咁啦，政府大樓日久失修死人冧樓，咁就有機會搵人問責嘞！
沒有留言:
張貼留言