直升機父母培育「小學雞」讀大學

小大學生

2013-9-9 6:00:04

Share on facebookShare on twitterShare on sinaweiboShare on email

自從踏入八月中，各大學迎新營展開後，地鐵上總會有一大群穿上O camp T恤年輕人跑來跑去，也有做出古怪動作，叫口號，我留意到公眾地方，其他人會投以奇怪眼光。O Camp過後，到咗開學日，傳媒報導父母陪同子女回大學開學，子女認為冇問題，只不過表示良好親子關係。跟住又有報導幾間大學設立家長日，帶家長參觀學生 上堂、宿舍生活。最新報導係有大學生為搞O Camp，借咗婆婆手推車唔還，亦有教授不滿學生遲到，將學生罰企。

直升機父母培育「小學雞」

近日圍繞本地大學生新聞，有意無意都在顯示大學生變小學雞。究竟傳媒故事有幾多代表性，唔多知。但在大學任教嘅舊同學，都不約而同提到大學小學雞現象。上 堂遲到，發出噪音，玩手機，凡邀請校外講者，總會擔心學生失禮人，令老師冇面。有人認為因大學改四年制後變得更中學化，大小考試，評核功課又多，大學生活 成為中學延續，難以獨立生活。教學模式重評核，源於校方要衡工量值，知道老師及學生係咪達到標準，但大學生小學雞化，問題根本可能來自中產直昇機父母。

我父母乃勞工階層，早在初中階段已放手不管，佢地心裡邊認為仔女升上中學，學識已比自己豐富，對子女決定唔再隨便干預。至於考入本地大學，父母當然好威， 認為光宗耀祖，但對子女選學系，大多唔會比意見。今日我地六十後一代做咗父母，比上一代冇咁寬容，因為自以為學識比子女多，要幫佢地作最佳選擇，以親子關 係名義去操控子女。當子女習慣咗父母高度介入學校、社交、甚至工作生活，早已養成習慣，根本冇考慮過有乜唔妥，心智上未有向成年人過渡。

今日做父母好似直昇機一樣在子女上空盤旋監視，一旦發現有唔妥，便化身飛虎游繩而下，為子女解決各種問題。究竟係幫佢定害佢呢。我好感激上一代，能夠對我有信任、尊重，相信我地自己搞得掂，唔會事事干預，我地有冇用呢種信任態度，去對自己下一代呢？

每一個大學小學雞，可能都有直昇機父母在背後！