港女是如何煉成

2014-3-22 17:27:45

Share on facebookShare on twitterShare on sinaweiboShare on email

【文：張飛人】
啱啱同台灣工作人員去酒店排隊check in，後面就有兩個師奶帶住一個大約5-7歲嘅小妹妹排隊，仲要講廣東話嘅，期間個小妹妹就講：
「媽咪，點解間酒店個大堂咁細嘅？」
「呢度台灣呀，係咁架喇，無乜大酒店，你忍下啦，住兩晚啫。」
「可唔可以換過第二間呀？」
「無啦，姨姨幫我地訂架，下次我地自己訂間好啲嘅酒店啦。」
「哦！咁間房會唔會好細架？」
「當然唔會好似我地住開嗰啲五星級咁大間啦，你忍下啦。」
我當時心諗，呢間都叫做四星級得黎仲要新酒店，你哋仲想點？阿小妹妹你得嗰幾歲大就咁樣，大個女仲得了嘅？
Check in其間，佢地都係我地隔離辦手續，但我見佢地不斷去「R」職員upgrade 套房。又話自己住開靚酒店唔慣住細房，又話自己一年出阜好多次，好多酒店都會主upgrade 房間俾佢，又話自己係乜乜酒店嘅會員……到最後職員都婉拒話無吉房upgrade 俾佢，但最後個師奶都唔放棄繼續「R」，話book咗兩間房，upgrade 一間做套房佢都會接受……最後我哋搞掂晒手續，我就黎料，我係旁邊講：
「想住套房就俾錢咪有得住囉，『R』黎『R』去，好醜啫，咪影衰香港人啦師奶。」
「關你咩事呀？你咁多事做咩呀？」師奶好惡咁講。我無理佢，剩係講句「正乞衣」就同工作人員走開。台灣工作人員問我香港人係唔係好鍾意咁樣做？我話我識嘅人就唔會咁，好彩台灣呢邊工作人員唔識聽廣東話，如果唔係就真係醜上加醜。
由於我地比較早check in ，酒店方面仲未整理好房間，要等多十分鐘先房咭上房，所以就喺大堂坐住等，之後師奶亦搞掂坐喺附近，但睇個情況應該「R」唔到套房。之後兩個女人就係咁講 酒店好離譜，check完in都仲要等房，仲話台灣人好無禮貌，好唔識得做生意，佢以後都唔會再幫襯呢間酒店喎。
但佢又無諗到人地酒店check in 時間係2點鐘開始，而自己就1點已經黎check in。諗諗下，都唔怪得個小妹妹細細個就咁樣，因為真係阿媽教成咁……
上到房，一間最普通嘅房都已經如上圖咁樣，真係想問點樣唔住得人呀？有要求係無錯，但唔該諗下自己付出幾多先啦，成日想一分錢，三分貨，你估成個世界都係以港女為先架咩？